Ikki viloyat rahbarlarining o‘rinbosarlari, tuman va shaharlari hokimlari, iqtisodiy kompleks rahbarlari ham ishtirok etgan uchrashuvda logistika, qishloq xo‘jaligi, sanoat, turizm, qurilish, savdo-sotiq sohalarida hamkorlik o‘rnatish, o‘zaro savdo aylanmasini sezilarli oshirish, shuningdek ijtimoiy sohada aloqalarni kengaytirish masalalari keng muhokama qilindi.

Samimiy o‘tgan uchrashuv va muhokamalar natijasida ikki viloyatning tuman va shaharlari o‘rtasida to‘g‘ridan to‘g‘ri hamkorlik qilish bo‘yicha ham kelishib olindi. Bunda Marg‘ilon va Norin shaharlari, Quvasoy shahri va Ak-talaa tumani, Farg‘ona va Atbashi, Toshloq va Jumgal, Quva va Norin, Oltiariq va Qochkor tumanlari o‘z iqtisodiy ixtisoslashuvidan kelib chiqib o‘zaro amaliy hamkorlikni yo‘lga qo‘yishadi.

Uchrashuvdan so‘ng viloyat hokimligi “Qabullar uyi” hududida qirg‘iz o‘tovi o‘rnatildi. Bu jarayonda ikki viloyat rahbarlari ham ishtirok etdilar. O‘tov o‘rnatilgach, ikki viloyat vakillari ichkariga kirib, mamlakatlarimizda tinchlik va omonlik abadiy bo‘lishini hamda viloyatlar o‘rtasida mustahkam hamkorlik o‘rnatilishini Yaratgandan so‘rab duo qildilar.

Muzokalar davomida ko‘tarilgan masalalardan yana biri turizm faoliyatini rivojloantirishga qaratilgan bo‘lib, ikki viloyatning diqqatga sazovor joylari, madaniy va turistik obyektlari, hushmanzara va sokin tabiat manzaralari to‘g‘risida gapirildi. Shundan kelib chiqqan holda bugun – 19-mart kuni Farg‘ona shahridagi zamonaviy “GRAND FERGANA” mehmonxonasida Farg‘ona va Norin viloyatlarining turfirmalari, turoperatorlari hamda har ikki viloyatning mutasaddi vakillar ishtirokida seminar-brifing bo‘lib o‘tdi. Unda Farg‘ona va Norin viloyatlaridagi istiqbolli turistik loyihalar atroflicha muhokama qilindi. Brifing yakunida viloyatlar o‘rtasida o‘zaro hamkorlikni yo‘lga qo‘yish, turistik maskanlar targ‘ibotini kuchaytirish va yangi turistik marshrutlar ishlab chiqish to‘g‘risida kelishib oldilar.