Ayni kunlarda mamlakatimizda turizm xodimining qo‘li qo‘liga tegmayapti, desak mubolag‘a bo‘lmaydi. Farg‘ona viloyatida deyarli har kuni Turizm faoliyati bilan bog‘liq bo‘lgan qandaydir tadbirlar bo‘lib o‘tadi.

Hususan, 27-mart kuni Farg‘ona viloyat hokimligining tashabbusi bilan viloyat Madaniyat, sport va turizm xodimlari kasaba uyushmasi tashkiloti, Madaniyat boshqarmasi, Jismoniy tarbiya va sport boshqarmasi hamda Turizmni rivojlantirish hududiy boshqarmalari bilan hamkorlikda “Sport salomatlik garovi” shiori ostida sport festivali o‘tkazildi. Festival “Sog'lom hayot uchun Besh ming qadam” tadbiri bilan boshlanib, stol tennisi, shaxmat-shashka va dars ko‘ratish sport turlari bo‘yicha musobaqalar o‘tkazildi. Musobaqada turli sohalarda mehnat qilayotgan xodimlar qatnashib, g‘oliblik uchun kurash olib bordilar. G‘oliblar esa, viloyat hokimligining faxriy yorliqlari va esdalik sovg‘alar bilan taqdirlandilar. Festival ommaviy axborot vositalarida keng yoritildi.

Shu kuni, viloyat turizmni rivojlantirish hududiy boshqarmasi xodimlari tomonidan O‘zbekiston Respublikasi Prezidentining 2019-yil 5-yanvardagi “O‘zbekiston Respublikasida turizmni jadal rivojlantirishga oid qo‘shimcha chora-tadbirlar to‘g‘risida”gi 5611-sonli farmoniga muvofiq Rishton tumanidagi “Xalqaro kulolchilik markazi”ga olib boruvchi ko‘cha boshiga, unga yaqin chorrahalarga zamonaviy andazadagi yo‘l ko‘rsatkichlar o‘rnatildi. Ular innovatsion texnologiyalar asosida yangi standartlar bo‘yicha ishlab chiqilgan bo‘lib, maxsus QR-kodga ega. U orqali viloyatning boshqa turistik obyektlar to‘g‘risida ham ma’lumot olish mumkin. Yoki “Xalqaro kulolchilik markazi” oldiga o‘rnatilgan turistik harita ham Rishtondagi turistik va hunarmandchilik obyektlari to‘g‘risida dastlabki ma’lumotlarni berib turibdi.

Ma’lumki, mamlakatimizda turistik maskanlar ko‘lamini kengaytirish bo‘yicha chora-tadbirlar jadallik bilan olib borilmoqda. Farg‘ona viloyatida ham bu borada qator ishlar amalga oshirilib, shu kunga qadar viloyatning 20 dan ortiq qishloqlarida “Turizm qishlog‘i” tashkil etish yuzasidan targ‘ibot-tashviqot tadbirlari o‘tkazildi. 27-mart kuni turizim salohiyati yuqori bo‘lgan Farg‘ona tumanining Avval va Satkak qishloqlarida “Turizm qishlog‘i” tashkil qilish maqsadida targ‘ibot ishlari olib borildi. Tadbir jarayonida bu qishloqlarda oilaviy mehmon uylarini tashkillash taklifi ham ilgari surildi. Natijada ushbu qishloqlarning 10 nafar fuqarosi oilaviy mehmon uyi tashkillash istagini bildirdi. Viloyat turizmni rivojlantirish hududiy boshqarmasi mutahasislari oilaviy mehmon uylari tashkillash yuzasidan yo‘l-yo‘riq ko‘rsatib, o‘z maslahatlarini berdilar.

27-mart kuni, Viloyat turizmni rivojlantirish hududiy boshqarmasi mutahasislari Farg‘ona shahrida yangi tashkillanayotgan mehmonxonada ham bo‘lishib, uni o‘rnatilgan tartibda sertifikatsiyaga ega bo‘lishi, mehmonxona yaratish qonun-qoidalari, zamonaviy shart-sharoitlar, sanitariya va kommunikasiya tizimlarining uzliksiz ishlashini ta’minlash va boshqalar me’yorlarga amal qilish lozimligi to‘g‘risida tushunchalar berildi. Tez kunlarda ushbu mehmonxona rasman ish boshlaydi.